આજે પાવન ધનતેરસ પર્વ: કેવી રીતે કરશો પૂજા, શું છે શુભ સમય અને શું ખરીદવું જોઈએ?

ધનતેરસનો પાવન તહેવાર આજે, 29 ઓક્ટોબરે ઉજવવામાં આવી રહ્યો છે, જે દિવાળીના પાંચ દિવસીય તહેવારની શરૂઆત કરે છે. આ દિવસની વિશેષતા એ છે કે દેવી લક્ષ્મી, ભગવાન કુબેર, અને આયુર્વેદના દેવતા ભગવાન ધન્વંતરીની પૂજા કરવાની પરંપરા છે. આ સમયે વાસણો, સોના અને ચાંદીના આભૂષણોની ખરીદીનો વિશેષ મહત્વ છે, જે ઘરમાં સમૃદ્ધિ અને સુખનું પ્રતીક માનવામાં આવે છે.

ધનતેરસના પર્વનું મહત્વ અને ઈતિહાસ

ભારતીય સંસ્કૃતિમાં ધનતેરસના પર્વને ખૂબ જ મહત્વ આપવામાં આવ્યું છે. આ દિવસને ઉજવવા પાછળ એક પૌરાણિક કથા છે, જેમાં કહેવામાં આવે છે કે સમુદ્ર મંથન દરમિયાન ભગવાન ધન્વંતરી હાથમાં અમૃતભરેલ પાત્ર લઈને પ્રગટ થયા હતા. તે દિવસ આસો મહિનાની કૃષ્ણ પક્ષની ત્રયોદશી તિથિ હતી, જે હવે ‘ધનતેરસ’ અથવા ‘ધનત્રયોદશી’ તરીકે ઓળખાય છે. આ દિવસથી લોકો આયુષ્ય અને ધન લક્ષ્મીના આર્શીવાદ માટે દેવી લક્ષ્મી અને ભગવાન ધન્વંતરીની પૂજા કરે છે.

ધનતેરસની પૂજા માટે શુભ સમય

આજે ધનતેરસના શુભ અવસર પર લક્ષ્મી માતા, કુબેર દેવ અને ધન્વંતરી ભગવાનની પૂજા કરી શકાય છે.

– પૂજાનો શ્રેષ્ઠ સમય સાંજે છે, જ્યારે શુભ મંગળમય માહોલ સાથે પૂજા કરવાથી ઘરમાં સમૃદ્ધિનો પ્રવાહ વધે છે.

– પંડિતો મુજબ લક્ષ્મી પૂજા માટે સાંજે 6:00 થી 8:00 વચ્ચેનો સમય ખૂબ શુભ ગણાય છે. આ સમયે પૂજા કરી, લક્ષ્મી માતાનો આશીર્વાદ મેળવી શકાય છે.

ધનતેરસ પર શું ખરીદવું શુભ ગણાય છે?

આ દિવસે ખાસ કરીને સોનું, ચાંદી અને નવા વાસણોની ખરીદી કરવી શુભ માનવામાં આવે છે, કારણ કે આ વસ્તુઓ ઘરના ધન અને સમૃદ્ધિને આકર્ષે છે.

સોના અને ચાંદીના આભૂષણો: સોનું અને ચાંદી ધારણ કરવાથી મા લક્ષ્મીનું આશીર્વાદ પ્રાપ્ત થાય છે.

વાસણો: એક માન્યતા છે કે વાસણોની ખરીદી કરવાથી ઘરમાં સુખ-સમૃદ્ધિ વધે છે. આ ખાસ કરીને તાંબા અને પિત્તળના વાસણો માટે માન્ય છે.

ધનતેરસ પર શું ન ખરીદવું જોઈએ?

જ્યોતિષશાસ્ત્ર અનુસાર, ધનતેરસના દિવસે કેટલીક વસ્તુઓ ખરીદવા અનુકૂળ નથી.

કાચની વસ્તુઓ: કાચને રાહુ સાથે સંબંધિત માનવામાં આવે છે, તેથી કાચના વાસણો ન ખરીદવા વિનંતી કરાય છે.

એલ્યુમિનિયમ: આ ધાતુને શાસ્ત્રોમાં અશુભ ગણવામાં આવે છે, તેથી એલ્યુમિનિયમની કોઈ વસ્તુ ન ખરીદવી.

ધારદાર વસ્તુઓ: આ દિવસ પર કટાર, છરી, કે કાંટા જેવી ધારદાર વસ્તુઓ ન લેવી જોઈએ.

કાળા રંગની વસ્તુઓ: ધાર્મિક દ્રષ્ટિએ કાળો રંગ અશુભ માનવામાં આવે છે.

ધનતેરસની પર્વની ધાર્મિક વિધિ

આ દિવસે દક્ષિણ દિશામાં યમના દીવો પ્રગટાવી આ દીપક સાથે પૂજા કરવાથી ઘરમાં શાંતિ અને સુખ-સમૃદ્ધિ વધે છે. આ દીવો પ્રગટાવવાથી અકાળ મૃત્યુનું જોખમ ટળી જાય છે અને ઘરમાં સકારાત્મક ઉર્જાનો પ્રવેશ થાય છે.